Петар Печков
Објавено: петок, 25 септември 2020
Денес и утре, петок и сабота, Велес му оддава почит на Коста Солев Рацин. Градот е домаќин на 57-те Рацинови средби, кои со содржините ќе потсетат на делото на бесмртниот поет.
Во 10 часот во салата на театарот започнува меѓународната конференција „75 години македонски јазик, азбука и правопис„ а во 11 ч. е сесијата „ Јазикот и стилот во творештвото на Горан Стефановски“. Тие се во организација на Институтот за македонски јазик „Крсте Петков Мисирков“.
Помеѓу овие два настани предвидени се промоции. Првата е на „Собраните дела“ на Горан Стефановски , промовирани од д-р Ана Стојановска . Потоа следи „Како да се нацрта разговорот“ од новинарот Свето Стаменов и проф. д-р Људмил Спасов чиј промотор е проф. д-р. Елена Јовановска Грујовска. По ова ќе бидат промовирани зборниците од меѓународните симпозиуми одржани на 55-те и 56-тите Рацинови средби, а промотор ќе биде проф. д-р. Људмил Спасов.
Попладнето во 17ч. е засадување на садници во шумата на Рацин, кај Спомен Костурницата. Од 18,30ч. е отворањето на манифестацијата, кое е предвидено да се случи во Амфитеатарот од Младински парк. Тука Беседата за Рацин ќе ја говори Васил Тоциновски. Предвиден е и меѓународен поетски митинг, со учество во живо на автори од Македонија и преку видео снимки на поети од странство. На крајот од првиот ден е планиран концерт на групата „Синтезис“.
Вториот ден од 57-те Рацинови средби, во родната спомен куќа на Рацин во 17,30 ч. е најавена промоција на збирка поезија од млади поети „Слушни ја тишината“. Во 19ч. е доделувањето на наградите за Рациново и Почесно Рацинови признание, нивен портрет, видео обраќање на добитниците на Почесното признание и концерт на камерниот оркестар „Ангел Шурев“. Настанот ќе се одржи во Амфитеатарот на Младински парк.
Ако временски услови не бидат добри, настанот ќе се одржи во салата на велешки театар.