Петар Печков
Објавено: петок, 25 септември 2026
Слатка по рецептите на бабите подготвија учениците од средното училиште „Коле Неделковски“ а ученците од економското „Јовече Тесличков“ ги спакуваа да изгледаат современо. Тоа се случуваше во просторот Дворче на Европската куќа во Велес.
Традицијата продолжува и со младите генерации, мерките за подготовка се менуваат, но тајните на подготвка се учат од постарите. Слатко и вода се служеле за секој пречек на гостите, како гест на гостопримство и внимание.
„Овој настан е дел од креативна дружна во Дворче, со различни содржини. Ова четврти настан, кога една дружба на млади може да биде преточена конкретно во овој случај во рецепт за слатко од сезонски овошја. Целта беше да ги собереме повозрасните и се дружат со помладите кои ги подговија овие специјалитети“ – рече Ирена Јорданова од Европската куќа во Велес.
За оваа пригода беше подготвено сезонско овошје слатко од смокви, модри сливи и дуњи. Го подготвија десетина учениците од средното училиште „Коле Неделковски“ од насоката угостителство.
„Подготувавме по рецепти, старински. Овошјето го подготвивме, работевме неколку часа, за време на пракса на училиште. Имавме совети од неколку професори. Беше убава забава и задоволство. Останува на гостите да проценат колку сме биле успешни“ – кажа Јана Кочова, ученичка во четврта година.
Се подготвија стотина теглички слатко, кое за бргу време беше поделно бесплатно на гостите во просторот Дворче. Дел од слатката се пробаа со леб, како некогаш. За изгледот на тегличките се погрижија учениците од економското училиште, насока дигитален маркетинг.
„За традиционалниот изглед на етикетите на теглите учевме, се инспириравме од објави на традицонални стари слатка. Боите се по избор со слатката, односно овошјата од кои беа подготвени“ - вели Леонид Велинов.
Повозрасните гости пак коментираа оти некогаш не треба запишан рецепт. Познатите услови се, само уште малку шеќер, нека поврие и за крај ќе знаеш кога ќе пробаш кога е готово.
А за пријатната вечер, во дворот на некогашното кино 11 Октомври се погрижи скопскиот Хот џез оркестар.
