Акушерско-гинеколошкото одделение на Општа болница Велес доби донација вредна 150 илјади евра. Таа е обезбедена од подпроектот Перимак-перинатално здравје, во соработка со повеќе германски фирми и амбасадата на Германија во Македонија. 

„Проектот ХОПЕ се реализира во Македонија десет години, кај мајките и децата. Почнавме во Скопје, продолживме регионално, еве сега се прошируваме и во Велес. Обезбедуваме соодветна здравствена опрема за да ја постигнеме нашата цел. Со задоволство можеме да кажеме дека за овие десет години, со заедничка работа ја намаливме смртноста кај овие групи, мајки и бебиња за 75 отсто“ – Питер Сизе, потпретседател на  проектот ХОПЕ. 

Медицинска опрема е обезбедена како резултат на долгорочното партнерство во подпроектот Перимак, наменета за  болниците во Велес, Гостивар, Струмица и Струга, за сите четири вредноста е половина милион долари. 

„За нас е важно да имаме добра опрема и обучен, квалитетен кадар. Тоа е основен столб. Така се подобрува квалитетот на здравствената услуга, посебно во вакви регионални центри“ – рече заменикот министер за здравство Јовица Андовски.

Во името на вработените, пациентите, благодарност изрази директорот на болницата  Александар Бузалков.

„Добивме по два породилни и  мајчински кревети, пациент монитори за деца и мајки, вакум екстрактор, ехо портабли, инструменти. Добивме голем број опрема, кој во моментов ни е потребна. Со донацијата ќе се подобри квалитетот на дадената здравствена услуга на тој оддел. Се надевам со новата опременост, со ангажманот на вработените ќе има поголем број на родени бебиња од  300 и нешто лани. Дел од опремата ќе оди и во неонатолошкото одделение“- информира Бузалков. 

Преку соработка со германските партнери досега е обезбедена медицинска опрема во вредност над 3,5 милиони американски долари, обучени се илјади здравствени работници.  Сизе вели дека  сумата не е важна, важни се постигнатите резултати. 

„Не станува збор за пари, сума, туку се што е вложено за подобрување на животот на мајките и децата.  Не е важно колку пари сте вложиле, туку кој е резултатот од инвестицијата“ -  дополни Сизе. 

„На овој начин непосредно им се помага на луѓето, на мајките на децата. Преку оваа опрема и тоа што се работи, се подобруваат работните услови за медицинскиот персонал, за тие да останат  тука и бидат ефективни“ – кажа Петра Дрекслер, амбасадорка на Германија во Македонија.

Поврзани »