Вечерва, петок велешки театар  „Јордан Хаџи Константинов Џинот“ ќе настапи  на Фестивалот на меѓународен алтернативен театар ФИАТ во Подгорица Црна Гора. Во официјалната селекција е театарската претстава  „Нема струја за електричниот стол” во режија на Дејан Пројковски, работена  по текст на Александар Секулов. Во претставата која е дуо драма,  настапуваат Васил Зафирчев и  Исидор Јовановски. Таа ќе се одигра со почеток од 21ч на сцената на Црногорско Народно позориште. 

Истата претстава велешки театар  ја изведе во Пловдив, на фестивалот “Сцена на крстопат”, како и на сцената на Београдско Драмско Позориште преку меѓународниот протокол “Наши Денови”.

Следниот ден, сабота, на ФИАТ, исто така во официјална конкуренција, ќе биде изведена и претставата   „Мац, Мац”. Таа   е копродукција со театарот “Пресврт”, режија и кореографија на Филип Петковски, работена според “Мачка на вжештен лимен покрив” од Тенеси Вилијамс.

Ова е второ меѓународно гостување на претставата, после настапот  ИТФ Приштина, каде беше и наградена. Претставата ќе се одигра на сцена на Културно информативниот центар со почеток од 19ч.
Доделувањето на наградите на ФИАТ е закажано за сабота вечер од 23ч.

На Фестивалот учествуваат театари од Црна Гора, Косово, Албанија, Македонија, Србија, БиХ, Хрватска, Италија, Франција, Летонија.

Поврзани »