На денот на планетата земја, 22 април, вработените од  Природонаучниот музеј на Македонија од Скопје, релизираа акција за пошумување на околината на езеро Младост, крај Велес.  Еко-акција беше именувана „100 садници за 100 години Природонаучен музеј“. 

“Садниците што ги садиме денес се јасен - автохтон вид, што значи дека природно расте на ова подрачје. Тој е прилагоден на локалната клима и почва, бара помалку одржување и има многу поголеми шанси да опстане и да се развие” –изјави  Ивана Здравевска, едукатор – приправник.

Националната установа Природонаучен музеј на Македонија годинава одбележува 100 години од основањето. Во текот на еден век континуирано работење, Музејот има значајна улога во колекционирање, истражување, презентација и заштита на природното богатство на државата, како и во развојот на научната и едукативната дејност.

Во рамки на програмата за одбележување на 100 години од постоењето, Природонаучниот музеј на Македонија ја реализираше оваа еко-акција. Денес беа засадени автохтони садници со цел обновување на дел од шумскиот појас кој пред неколку години беше зафатен од пожар, како и подигнување на јавната свест за значењето на пошумувањето и заштитата на животната средина.

“Денес не сме тука само да засадиме садници, туку да направиме мал, но значаен чекор кон заштита на планетата Земја ” – дополни Здравевска.

На посадувањето учествуваа и ученици од средното училиште „Коле Неделковски“ од Велес, членови на Извиднички одред „Димитар Влахов“ од Велес, како и локални волонтери.

Акцијата се реализираше со поддршка на ЈП Национални шуми која го подготви теренот за садење а садниците се обезебдени со спонзорство од Агроиндустриската групација АГРИА.

Поврзани »