Петар Печков
Објавено: петок, 07 август 2026
Реките Тополка и Бабуна не се препорачуваат за капење, покажуваат резултатите од анализите на водите извршени од Центарот за јавно здравје Велес. Податоците се добиени по поставеното прашање за квалитетот на водите од овие реки. Водите се анализирани во месец јуни. Двете реки се планински и извираат од планината Јакупица.
Така велешани летово освежување од високите температури можат да најдат само на Градскиот базен и базените од хотелите во околината на градот. Езерото Младост две години е забрането за капење.
Река Тополка пред влив во Вардар близу Велес, според извршените испитувања и стручната анализа водата не може да се користи за капење и рекреација на луѓето. Анализираниот примерок на вода бил во 5-та класа по матност, на 3 -та класа по бактериска контаминација, сатурација и присуство на амонијак и нитрити, а по однос на останати испитани параметри е во втора и прва класа.
Бабуна прва плажа, во долниот тек, каде летово бројни велешани се рекреираат не може да се користи за капење и рекреација на луѓето. Оваа констатација на стручните лица од Центарот за јавно здравје Велес е по анализираниот примерок на вода кој бил 3-та класа по бактериска контаминација, со присуство на амонијак и манган, а по однос на останати испитани параметри е со втора и прва класа.
Неколку години не се мери квалитетот на реката Вардар низ Велес, од Башино Село до вливот на Бабуна, бидејќи таа не се користи за капење од страна на велешани.
Така иако имаат околу градот повеќе понуди за одмор и рекреација две планиснки реки, реката Вардар и езерото Младост, велешани не можат да ги користат за капење, бидејќи водата е загадена.
