Жител на Горно Оризари, С.Ц. кој беше затекнат од пoлицијата како предизвикува пожар, на локална депонија, експресно доби обвинение и ќе седне на обвинителна клупа во Основен суд Велес.

Основното јавно обвинителство Велес поднесе Обвинителен предлог, за обвинетиот  за кривично дело – Предизвикување општа опасност според член 288 став 1 од Кривичниот законик, за што е предвидена казна  затвор од шест месеци до пет години.

„Обвинетиот 25-годишник, на 21 јули, на дива депонија во селото, со умисла предизвикал пожар, палејќи стари седишта од автомобил. Бидејќи местото било обраснато со сува трева, а на депонијата имало и бали суво сено и други предмети, огнот брзо се проширил. Со тоа обвинетиот предизвикал значителна опасност по животот и телото на луѓето и по имотот во околните села. Опасноста да биде предизвикана штета од големи размери со ваквите дејствија на обвинетиот е особено изразена со оглед на алармантната состојба со пожарите во околината на Велес и на територијата на целата држава“- соопштија од ОЈО Велес.

Заедно со обвинението, надлежниот јавен обвинител до Основниот суд во Велес доставил предлог за определување мерка притвор за обвинетиот, поради опасност од бегство и можност да го повтори делото. Судот го прифатил предлогот и ја определи бараната притворска мерка.

Поврзани »