Слаб интерес покажале ранливите категории велешани, по повикот од локалната власт за работно ангажирање. Општина Велес која го распиша јавниот повик, имаше потреба од 10 лица кои се приматели на гарантирана минимална помош и невработени лица, за извршување на јавни работи во времетраење од 10 месеци. Се јавиле седум, петмина биле ангажирани, одговорија надлежните на поставеното прашање од ТрМр.

„Во врска со објавениот Јавен повик за ангажирање на лица за извршување на јавни работи кои се приматели на гарантирана минимална помош и невработени лица со живеалиште на територија на Општина Велес од 14.02.2025 година,  од вкупно седум поднесени барања,  шест  доставиле уредна документација и ги исполниле условите пропишани на Јавниот повик, а еден барател нема доставено Потврда со која се потврдува дека лицето е корисник на социјална помош или невработено лице. Еден ден подоцна кандидат кој ги имаше исполнето условите , од лични причини поднесе барање за повлекување на барањето по Јавниот повик и заради тоа  Договор за работно ангажирање е склучен со пет лица. Истите започнаа со работа на 03.03.2025 година со работни задачи на различни локации на територија на општина Велес“ – одговорија  од локалната власт на поставеното прашање.

Месечниот надоместок за рабаотно ангажираните  изнесува 20.000,оо денари со вклучен персонален данок за секое ангажирано лице. Ангажираните лица работат на јавни работи -чистење на улици, локални патишта, патеки, скали, чистење на водотранспортни објекти, отстранување на наноси и одрони, фарбање на комунална опрема, чистење на јавни објекти, поставување на опрема, собирање на отпад, чистење на депонии, подигање и одржување на зелени површини и други слични работи по потреба.

Поврзани »