По барање на јавен обвинител од ОЈО за гонење на организиран криминал и корпупција,  Судија на претходна постапка од Основен Кривичен суд Скопје,  му одредил триесетдневен притвор на велешанецот А.С.

„Осомничениот како службено лице, вечерта на 30.3.2025 година на паркинг просторот пред хотел во Велес се сретнал со неповикано лице – сведок во постапката и му покажал службени документи на МВР, што претставуваат службена тајна. Притоа му дозволил на сведокот истите да ги снима, кажувајќи му кој документ за што се однесува. На овој начин, осомничениот од користољубие, а со цел да бидат објавени на социјалните мрежи, сторил достапни службени документи што претставуваат службена тајна, со цел да прибави паричен износ од 50.000 евра од лицето за кое се однесувале документите“, соопштија од обвинителството.

Од обвинителството напоменуваат дека „ниту лицата, ниту документите во овој предмет, не се поврзани со лицата и групата од Грчец“..

Тој вчера беше уапсен откако беше фатен во Велес, на паркинг пред хотел,  со  службени материјали од Министерството за внатрешни работи. Уапсениот  е осомничен за кривичното дело по член 360 став 2 од Кривичниот законик,  за оддавање на службена тајна заради користољубие или користење на податоците во странство, за што како сторителот може да добие  казна со затвор најмалку една година. Според МВР, тој незаконски поседувал материјали од Министерството, кои ги оддавал на трети лица.

„При спроведувањето на полициската акција и преземените мерки и активности, на паркинг просторот пред хотел во Велес, во возило БМВ затекнати се А.С., полициски службеник во Одделот за заштита на определени личности и објекти и Б.К., а при извршен претрес во возилото пронајден е ранец со службени материјали од МВР и од лицата се одземени мобилни телефони, по што се лишени од слобода. Исто така, од преземените мерки и активности во процесот на проверка, ОВККИПС констатира дека полицискиот службеник постапувал спротивно на законските и подзаконските акти на Министерството за внатрешни работи, со што истиот неовластено поседувал службени материјали, нивно откривање на трети лица надвор од Министерството, а со кои дејствија го извршил кривичното дело по член 360 од КЗ“ – соопштија од  МВР.

Дилемата во јавноста е од кого, или кој му ги доставувал документите на А.С. за кои тој не можел да ги поседува, поради работните задачи кои се спротивни од тоа што го имал како материјал.

Поврзани »